A l'eau, à l'eau !

Nan, mes gins, ch'est pont ein' erreur ed frappe, je n'sus point in train d'vous téléphoner, j'vas vous raconter l'nuit d'infer du 27 août 2003. Figurez-vous que l'nuit-là, su les cops d'chinq heures, em' fem-me a m'révelle in m'dijant : " I s'passe quèque cosse ed pas normal déhors, vas j'ter ein cop d'oeul, j'sus pont tranquille". In effet, y avot ein ramdam ed tous les côtés : in lévant ches volets, mon Diu ch'tchien !, pour peu je m'séros pinché in véïant I'dallache : dé l'iau et de l'mollique tout partout et cha n'arrêtot pont d'pleuvoir ! Si j'avos eu l'cœur à rire, j'aros pu m'dire "cha s'corse", vu que m'mason alle étot comme ed'su ein' île (mais pont d'Beauté, à coup sûr!). Su l'cop d'six heures, ch'l'arnu i s'a arrêté, l'jour i s'a lévé et j'ai vu I'pinaque : dins min garache, y avot des blocs ed bidoulle dins tous ches coins : ches vélos, em' caisse ed pêque, l'tondeusse, tous mes othieux et tout I'resse à l'av'nant ; l'pelousse al avot l'air d'ein camp d'pétotes, ches plaques d'égout i'z avot't volé in l'air, ch'carpion i étot soul'vé, cha déplaquot tout partout, bref in avot vraimint touché l'gros lot !

Ein' semaine qu'in a mis, m'fimme et mi, pour faire ch'nettiache ! Mais l'pus pire dins l'histoire, cha été aveuc ches assurances : et qu'i leu fallot des papiers, des photos, des factures, l'train-train, quoi ! Et ch'est là qu'j'ai fini par comprinde in truc : j'étos dév'nu vétusse ! Quand j'ai archu ches papiers dé m'n assurance, ch'étot écrit : "vétusté pour une tondeuse 6 ans, 60%, pour une bicyclette de 9 ans, 90%, etc... ". Rindez-vous compte, mes gins : mi j'sus né in 40, alors j'sus vétusse à 620%, autremint dit, j'ardouos quéque part ! Mais y a ein' sécot qui n'va nin, comme qu'in dit dins ch'Nord : cha fait pu d'quarante ans que j'cotisse à l'assurance, chel prime, al devrot arminter ou rabacher ?

Final'mint, in a perdu des pleumes, cha ch'est sûr, mais quand ein d'mes comarates d'Alloine (Allouagne) i nous a téléphoné, in s'est dit qu'dins nou (pitit) malheur, in avot eu d'la chance ! A I'télé, i nous ont amoutré ches dégâts, in arot cru vir ein arportache dsus la guerre, qué misère !

Cha qui m'mets l'pu in rache, dins cht'histoire, ch'est d'vir tous ches responsapes donner leu avis, espliquer l'pourquoi du commint d'ches inondations, nous raconter des cacoules comme quoi in allot créer des "commissions d'enquête pour déterminer les responsabilités", et patati, et patata... et d'puis, pu rien qui bouche, à croire qu'i'z ont fait leu devoir pasque ches inondés i allottent ête rimboursés, et cha ch'est cor à vir ! Cha m'ramintuve ein' phrasse ed Clémenceau qui dijot: "Quand je veux enterrer une affaire, je crée une commission" : comme quoi, y a rien d'nouviau d'sous I'solel !

Si j'ravisse à L'Pugnoy, ches routes al sont incor pleines ed tros, y a toudis pont d'fossés nettiés, ein' commission al devot inquêter, in n'a mie rien vu d'tout cha, alors in attind l'prochaine grosse pleufe, si cha tompe (ju d'mot) et l'iau al va armonter au lieu d'déchinte, ed peur d'ches fameusses "commissions d'enquête" !

Comme o vëiez, mes gins, j'n'ai pas cangé, toudis aussi arv'leux, mais comme jé l'dis souvint, j'vas assaïer d'canger... mais y ara du traval ! Allez, mes gins, à ches pleuffes.

                                                                Raymond LANCIAL

Novembre 2004