|
Paroles et musique: Alexandre Desrousseaux,
1855
Refrain
Dors, min p'tit quinquin,
Min p'tit pouchin,
Min gros
rojin,
Te m' f 'ras du chagrin
Si te n' dors point chqu'à
d'main.
Ainsi, l'au' jour eun' pauv' dintellière,
In amiclotant sin
p'tit garchon,
Qui, d'puis tros quarts d'heure, n'faijot qu'braire,
Tâchot
d'l'indormir par eun' canchon.
Ell' li dijot : " Min Narcisse,
D'main t'
aras du pain n'épice,
Du chuc à gogo,
Si t'es sache et qu'te fais
dodo.
"Et si te m' laich' faire eun' bonn' semaine
J'irai dégager tin
biau sarrau,
Tin patalon d' drap, tin gilet d' laine…
Comme un p'tit
milord te s'ras farau !
J' t' acat'rai, l' jour de l' ducasse,
Un
porichinell' cocasse,
Un turlututu,
Pour juer l'air du "Capiau
pointu".
"Nous irons dins l' cour Jeannette-à-Vaques,
Vir les
marionnett's. Comm' te riras,
Quand t' intindras dire:"Un doup' pou'
Jacques!"
Pa' l' porichinell' qui parl' magas!…
Te li mettras dins s'
menotte,
Au lieu d' doupe, un rond d' carotte!
I' t' dira : "Merci
!.."
Pins' comm' nous arons du plaisi !
"Et si par hasard sin maîte s'
fache,
Ch'est alors Narciss' que nous rirons !
Sans n'n avoir invi', j'
prindrai m'n air mache,
J' li dirai sin nom et ses sournoms,
J' li dirai
des fariboles,
I' m'in répondra des drôles,
Infin, un chacun
Verra deux
pestac' au lieu d'un…
"Allons serr' tes yeux, dors min bonhomme,
J'
vas dire eun' prière à P'tit-Jésus,
Pour qu'i' vienne ichi pindant tin
somme,
T' fair' rêver qu' j'ai les mains plein's d'écus,
Pour qu'i'
t'apporte eune coquille,
Avec du chirop qui guile,
Tout l' long d' tin
minton…
Te t' pourlèqu'ras tros heur's de long !
"L' mos qui vient, d'
Saint-Nicolas ch'est l' fiête,
Pour sûr, au soir, i' viendra t'
trouver.
I' t' f ' ra un sermon, et t' laich'ra mette,
IN d'zous du balot,
un grand painnier,
I' l' rimplira, si t'es sache,
D' séquois qui t'
rindront bénache,
Sans cha, sin baudet
T'invoira un grand
martinet."
Ni les marionnettes, ni l' pain n'épice
N'ont produit
d'effet. Mais l' martinet
A vit' rapajé l' petit Narcisse,
Qui craignot d'
vir arriver l' baudet.
Il a dit s' canchon dormoire..
S' mèr' l'a mis dins
s'n ocheinnoire.
A r'pris sin coussin,
Et répété vingt fos che r'frain
:
Dors, min p'tit quinquin,
Min p'tit pouchin,
Min gros
rojin,
Te m' f 'ras du chagrin
Si te n' dors point chqu'à d'main.
|
